Бикитиэкэ диэн сиртэн ылыллыбыт
Таатта үрэх үрдүгэр
Таатта үрэх үрдүгэр,
Таалар хонуу түөһугэр,
Таптал уотун күллэрэ,
Тардыы талах үүнэрэ...
Эдэр чэгиэн туруйа —
Элбэх эҥин буруйа,
Үөрэр-көтөр буолара,
Үөрэ-дьүөрэ туойара...
Кээчик-кээчик Кэчиини,
Кэрэ, нарын Кэчиини
Уоһун-тииһин ууруура,
Ууруу-сыллыы оонньуура...
"Кээчик-кээчик Кэчиикэ,
Кэрэ, нарын Кэчиикэ!
Таптал уотун убатыах,
Татыйыгы ыллатыах...
Кырдьар сааспыт кэлиэҕэ,
Кырыа хаары тибиэҕэ,
Уохтаах таптал умнуллуо,
Уота-күүһэ умуллуо...
Үөрэн-көтөн туруохпун,
Үөрэ-дьүөрэ туойуохпун
Уураа-сыллаа, сэгэттэй!
Ууруур-сыллыыр үчүгэй!"
Эдэр чэгиэн туруйа —
Элбэх эҥин буруйа,
Үөрэр-көтөр буолара,
Үөрэ-дьүөрэ туойара...
Кээчик-кээчик Кэчиини,
Кэрэ, нарын Кэчиини
Уоһун-тииһин ууруура,
Ууруу-сыллыы оонньуура...
6.XI.1936
|
|
