Фантазия (Моисей Ефимов)

Бикитиэкэ диэн сиртэн ылыллыбыт

Фантазия


Баар эбит дьикти алып —
Омуннаах фантазия,
Киэптэтэргэ дылы арыт
Бэл дархан История.

Күн, Сир иитин арҕарар,
Үйэлэри билиммэт.
Улуу дьону кытта баҕар
Атах тэпсэ эн кэпсэт.

Ыалдьыттаа биир остуолга
Хайямнаах Алампаны.
Ыҥырталаа оһуохайга
Мараты, Манчаарыны.

Ааспыкка тэҥнээн сөхтүн
Бу бүгүҥҥү Дьокуускай
Таас килэмэн көстүүтүн
Бестужев-Марлинскай.

Туһуннун миэнэ сиэним
Бэрт Хараны кытары.
Ыллаатын марсианин
Ойуунускай ырыаларын.

Кырдьыгы тумус тутун,
Омуннаах фантазия.
Сымыйалыаҥ — туора сотуо
Дьиппиэн, нүһэр История.