Сардаана
Билэҕинэн, кыыс курдук кэрэҕин,
Сардаана, сандаарар сибэкки?
Бу намыын мин Аммам үрэҕин
Кытылын таптыыр да эбиккин.
Эйиэхэ сарсыарда таммах уу
Чөмчүүк таас киэргэллии ииллистэр —
Күн көмүс уотугар оонньуурдуу,
Күндээрэ, чаҕылла илгистэр.
Биһиккэ оҕотун саататар
Күн күбэй ийэтин санаата,
Тыал оргууй эйиигин бигиирдии
Нуурата-нусхата хамсыыр дии.
Ардыгар кыыс оҕо тапталтан
Кыбыстан, кытаран хаалааччы,
Оттон эн, сардаана сарыалтан
Кыыс курдук кыыһаҕын дьиҥ чахчы.
Сардаана, сардаана барахсан,
Сиэдэрэй сибэкки эбиккин.
Ол иһин даҕаны саас ахсын
Симэх от буолаҥҥын үүнэҕин.
1995