Андаҕар (Ойуунускай)

Бикитиэкэ диэн сиртэн ылыллыбыт

Андаҕар


Алдьархайдаах аан дайды
Алтаттан биирдэрин
Киин тутааҕа буолбут
Кремль кириэппэс
Аллараа таһаатыгар,
Алгыстаах, далбарыгар,
Ильич уҥуоҕун
Иннигэр тураммыт -
Советскай союзпут
Сэрииттэн кыайтарбат,
Уйадыйбат укулаат
Уобуруччата буолбут
Большевик партия
Баараҕай күүстэрин
Күүһүрдэн иһэргэ,
Күүрээннээн биэрэргэ
Кыһыл былааҕынан,
Кыырыктаах тылынан
Аан дархан андаҕары
Андаҕайдахпыт буоллун...

Алдьархайдаах аан дайды
Алтаттан биирдэригэр
Хаанынан-этинэн,
Хараҕын уутунан
Үлэһит, бааһынай
Үүннэрбит көҥүлүн
Капитал күүһүттэн
Харыстыыр иннигэр,
Куорат, дэриэбинэ
Куомуна холбоспут
Оҕурук ситимин
Ордуктук кичэйэр
Саргылаах санааны
Саталаан тураммыт,
Ильич уҥуоҕун
Иннигэр киирэммит -
Кэннигэр хаалларбыт
Кэриэһин толорор
Аан дархан андаҕары
Андаҕайдахпыт буоллун...

Алдьархайдаах аан дайды
Араҕас далбарыгар
Өрөгөй дьалхааммыт
Өргөстөөх күүһүнэн
Баттаммыт-үктэммит
Барыта тураннар,
Күүрээннээх мөккүөрү
Күүһүрдэн эрэллэр...
Иккиттэн биирдэспит
Инники буоллун диэн,
Өрөгөй өһүөннээх
Өлөрсүү туһугар,
Бары сир баһынан
Баттаммыт норуоту
Коммуна аатынан
Холбуурга-түмэргэ
Ильич уҥуоҕун
Иннигэр тураммыт -
Аан дархан андаҕары
Андаҕайдахпыт буоллун...
 



  


1927 с. тохсунньу 20 к. Москва