Бикитиэкэ диэн сиртэн ылыллыбыт
Атаака
Күнү-ыйы кытардар
Өһех хааны... о, сүрүн...
Көрдүм, өйү туймаардар
Өлөр өлүү мөккүөрүн...
Оһол-илбис күүлэйэ
Саҕаланна сарсыарда,
Орудие лүҥсүөрэ
Сатарыйа дарбыарда.
Сири-буору сиксийэр
Сата-буурай аргыары,
Силлиэ-буурҕа иһиирэн,
Сатыылатта илбиһи.
Хайа быара быһыттан,
Хара буруо халыйда,
Халлаан имэ харыастан,
Хараҥаран барыарда...
Өргөстеммүт бэйэбит
Хоҥуннубут окуоптан,
Өрө сүүрэн киирдибит,
Холоруктуу ытыллан.
Снаряд, гранат дапсыыра -
Таалар налыы хотоолго,
Хаалыы-быстыы ыһыыта —
Траншея хорооҥҥо.
Өһөгөйдөөх сарпалаах
Хатыы харах саҕыллар,
Өрө ууммут батастаах
Хабыр күлүк барыллар...
Түөстэн туөскэ түрүйсэн
Ырба оххо кэтиһии...
Саллар сааһын тухары
Атаан-мөҥүөн харсыыга
Сайылаабыт саастааҕы
Албан нуучча ыстыыга!
Тиэрэ баран, иэнинэн
Кэлэн түһэр ким эрэ,
Тэпсэн ааһар үрдүнэн
Кэлин кэрии дьүккүөрэ...
Күнү-ыйы кытардар
Өһөх хааны... о, сүрүн...
Көрдүм, өйү туймаардар
Өлөр өлүү мөккүөрүн...
|
|
