Дьон уҥуоҕа өтөхтөргө... (Моисей Ефимов)

Бикитиэкэ диэн сиртэн ылыллыбыт

Дьон уҥуоҕа өтөхтөргө...


Дьон уҥуоҕа өтөхтөргө
Үгүстэр да үгүстэр.
Биир өйдөбүл хаалар өйгө:
"Олорбуттар... өлбүттэр"...

Мутугунан быраҕар
Муҥур үйэ муҥкугар
Бу кириэстэр, бу чардааттар
Туоһу курдук тураллар.

Хайдах дьон олоорторо
Биллибэттэр, биллибэттэр.
Суолларын омоохторо
Быралыйа сүппүттэр.

Хаалбыт дуо ханна эрэ
Ыарахан ынчыктара?
Эбэтэр дьикти кэрэ
Үчугэй ырыалара?

Оо, суох! Ону булбаккын.
Мэлдьэһэр хаҕыс сиккиэр.
Сэбирдэххэ таабырынын
Кистээтэ аптаах сипсиэр.

Оо, сиккиэр, мин иһиттим
Симиттэн сипсийэргин,
Ол дьон кэнэн үйэтин
Кыбыстаҥҥын кистииргин.

Кыбыстыма, сүрдээх-кэптээх
Ньүдьү-балай да кэмҥэ
Олоруохтаах этэ эбээт
Киһи аймахтан ким эмэ.

Дьиҥнээх дьолу билбэккэлэр
Олорбуттар... өлбүттэр...
Кинилэртэн кэнчээрилэр
Син дьэ ууһаан испиттэр.

Ууһаан, сайдан, тэнийэн
Бүгү күҥҥэ дьэ кэлбиттэр,
Бу самнархай өтөхтөртөн
Ырааппыттар, тэйбиттэр.

Кэскил суолун тутуспут
Миэнэ үүнэр көлүөнэм
Хайдах-туох олорбутун
Билиэҕэ кэлэр үйэм.

Билиэҕэ суоруллубат
Сурукпуттан - ырыабыттан.
Оччолорго туох хаалыаҕай
Бу эмиэ чардааттартан?

Дьон уҥуоҕа өтөхтөргө
Үгүстэр да үгүстэр.
Бүгүҥҥү өрөгөйгө
Тиийбэккэлэр өлбүттэр.

Ол эрээри кэнчээрини
Ууһаппыт өҥөлөөхтөр.
Санаттыгыт бэрт элбэҕи
Дьон уҥуохтаах өтөхтөр.