Бикитиэкэ диэн сиртэн ылыллыбыт
На смерть вождя
Кыһыл сардаҥа тахсыбыт,
Кыымнаах төлөн түспүт,
Модун санаа туругурбут
Москва куораппар —
Халлааҥҥа тыгар төлөннөөх,
Хара дьай дьураалаах
Кытарар дьэргэн былааҕым
Кыыһан-ыыһан тахсан,
Хара санаа күлүктэннэ,
Хааннаах төлөнүнэн
Кырыыстаах сирим үрдүнэн
Кытара умайда...
Сордоох-муҥнаах сорун-муҥун
Солбонутан туран,
Саргылаах саарыстыбаны
Салайан аҕалбыт,
Дьоллоох олоҕу оҥорбут,
Дьол-соргу тутуспут,
Өрөгөй өлбөт санаалаах,
Өркөн төлөн тыллаах,
Эрэйдээх-муҥнаах иннигэр
Эппитин толорбут,
Кэннитинэн кэхтибэтэх
Кэрэ киһи өллө...
Үлэһит дьону үрдэтэн,
Үрдүк үтүө аата
Үйэттэн үйэ тухары
Үрдүү-үүнэ туруо.
Көмүс уҥуоҕун көтөҕөн
Көмнөрбүт даҕаны,
Санньыйбыт санаабыт ааһан
Сата-буурай оонньуо...
Хоту-соҕуруу сирдэргэ
Холорук буурҕанан
Алтан-тимир араҥастаан
Айхаллаан-айаатаан,
Өрүтэ күүрэн тахсаммыт —
Өргөстөөх өрөгөй
Союзтаах соргу улаатар
Солун соргу кэлиэ...
Илиҥҥи-арҕаа сирдэргэ
Илбистээх сатанан
Хаамар хаамыыны хаҥатан,
Хааннардаах кырыыһы
Хара дьайдарын алдьатан,
Хампарыта охсон,
Үрүҥ-хара сэриилэри
Үнтүрүтэ тэпсэн.
Омук омугу барытын
Охсуспат-кыргыспат
Сайаҕас саргы санаалаан —
Саргы-дьаалы тупсуо...
Кытарар дьэргэн былааҕым
Кыыһан-ыыһан тахсан,
Кырыыстаах сирим үрдүнэн
Кытара умайда...
Көмүс уҥуоҕун көтөҕөн,
Көмнөрбүт даҕаны,
Санньыйбыт санаабыт ааһан,
Сата-буурай оонньуо...
23/1-1924, Москва к.
|
|
