Сааскы ууга саһааккаҕа… (Павлов Николай Гаврильевич)
Сааскы ууга, саһааккаҕа
Сааскы ууга, саһааккаҕа,
Сааһыт, саһан, иһийэр;
Үөрдээх кустар эргийэннэр
Элиэтээннэр иһэллэр.
Удьуор булчут сааҥ чыыбыһын
Тардан кэбис – сыыһыма,
Сэһэн-тэптэн номох буолуон
Отой мүччү туттума.
Биири-биэһи суулараҥҥын,
Бэрт эбиэти булунуоҥ;
Уһун түүҥҥэ тоҥон-хатан
Олорбуккун боруостуоҥ.
Ити курдук ньоҕойдоһон,
Сааскы болдьох бүтүөҕэ;
Саабыт тыаһа дуораһыйан,
Ыраах эҥсэн сүтүөҕэ...
Сааскы ууга, саһааккаҕа,
Сааһыт саһан, иһийэр;
Үөрдээх кустар эргийэннэр
Элиэтээннэр иһэллэр…
1991 с. Ыам ыйа. «Хара күөл».
1996 с. "Үөһээ Бүлүү" хаһыакка бэчээттэммитэ.
The permission for use of this work has been archived in the Wikimedia OTRS system; it is available for users with an OTRS account. To confirm the permission, please contact someone with an OTRS account.