Сайылыкка (Суорун Омоллоон)

Бикитиэкэ диэн сиртэн ылыллыбыт

Сайылыкка[уларыт]

Сирэм күөх сайылык барахсан
Симэҕэ, оһуора ситтэҕиэн: —
Сайыҥҥы саймаархай салгыҥҥа
Сайыта тыыныахха көҥүлүен,
Долгураан көп солко хонууга
Доҕордуун хаамсыахха күндүтүөн.

Эргиччи көрдөххө барыта
Ирбэнньик мутукча, меһүүрэ; —
Сир ийэ дьэрэкээн симэҕэ
Сибэкки тэтэрэ мичээрэр.
Күөх өндөл халлаантан күн уота
Күрүлгэн сүүрүктүү күндээрэр.

Сирэм күөх сайылык барахсан
Симэҕэ, оһуора ситтэҕиэн; —
Сайыҥҥы саймаархай салгыҥҥа
Сайыта тыыныахха көҥүлүөн,
Долгураан көп солко хонууга
Доҕордуун хаамсыахха күндүтүөн.