Саһархай хааннаах...(Алампа)

Бикитиэкэ диэн сиртэн ылыллыбыт

* * *



Саһархай хааннаах,
Саҥардыы сааһыран эрэр
Саха кыыһа барахсан,
Суһуоҕун оҕотун
Санныгар санньылытан,
Уулларбыт хорҕолдьун курдук
Уу хараҕынан
Уҥуор-маҥаар
Унаарыччы көрө-көрө,
Умса түһэн
Уйадыйа олорбута...
Туохтан,
Күөх от көрдүк
Күөгэҥнэс көҥүлэ
Күһэллибитэ буолуой?
Туохтан,
Ырыа чыычаах курдук
Ылбаҕай ыраас санаата
Ыгыллан ыараабыта буолуой?
Туохтан,
Сааскы салгын курдук
Сайаҕас-саргы санаата
Самнан санньыйбыта буолуой?




Алампа

Сүрүн сирэйгэ