Туохтан? (Алампа)

Бикитиэкэ диэн сиртэн ылыллыбыт
Перейти к навигации Перейти к поиску

Туохтан?


Туохтан
Сүдүрүүннээх санаалар,
Сүнньүм үүтүнэн сүрүннэнэн,
Сүрэхпэр сөҥөр буоллулар?
Туохтан
Саппахтаах санаалар,
Санным үүтүнэн сааллан,
Санаабын саппаҕыттылар?...
Туохтан
Өһөхтөөх өйдөр,
Өттүгүм үүтүнэн үктэллэнэн,
Өйбүн өһөрдүлэр?...
Туохтан
Барабах майгылар,
Баспынан батарыта киирэн,
Баспын баттаатылар?...
Туохтан
Ыарахан санаалар,
Ыга анньан киирэн,
Ыар баттык буоллулар?...
Күннээҕи олох күөмчүтэ
Көй салгын буолан
Күлүктүү көттөҕө дуу?
Сүңкэн олох сүдүрүүнэ
Сүлүһүн буолан
Сүрэхпэр сөҥнөҕө дуу?
Халың олох хапсыыра
Халык буолан
Харахпын саптаҕа дуу?
Эбэтэр
Эрэй баҕайы илбиһэ
Этэр тыла суох буолан
Эппэр иңнэҕэ дуу?
Миигин
Хаххалыыр хара санаа – халбарый,
Күлүктүүр күтүр санаа – күрэн,
Баттыыр балыыр санаа – бар,
Ынчыктыыр ыар санаа – ыһылын,
Санаарҕатар саппах санаа – сайҕан.


1926


Алампа