Түннүккэ түспүт ойуу
Түҥ былыргыны санатар, -
Ол онно ойуур хоп-хойуу,
От күөҕүнэн аҥылыйар!
Ханнык эрэ аар өбүгэм
Хара хараҕын кэриэһигэр -
Онон-манан өстүөкүлэм
Хап-харанан килбэчийэр.
Ол оҕонньор. Баттаҕа
Олус эрдэ маҥхайдаҕа -
Дьыбар түһэн тайаннаҕа,
Дьикти оһуору хааллардаҕа.
Ити курдук санаабытым
(Соччото дуу баҕарбытым?..)
Тымныы туойар түүнүгэр,
Сойбут оһох төрдүгэр.