Хомус (Өксөкүлээх Өлөксөй)

Хомус Өксөкүлээх Өлөксөй

Айыҕат хаан аймаҕа
Аан ийэ дайдыны
Айар күнүгэр,

Икки атахтааҕы

Ийэ сиргэ

Кэскиллиир күнүгэр

Ураанхай дьону
Орто дойдуга
Олохтуур күнүгэр,-

Хохуоралаах тыллаах,

Хоҕгунас тыастаах,

Холобура суох хоһоонноох

Хомус барахсан

Хомуһуннаан айбыта үһү.

Ол кэннэ таҕхалаабыта үһү
Ол курдук диэн:
"Бэрт тимиринэн бэйэлээтим,
Сүдү тимирэн бэйэлээтим,

Сыыйыы тимиринэн сыҕаахтаатым,

Дьикти тимиринэн тиэрбэстээтим,

Тыйыс тимиринэн тыллаатым.

Араас омук
Альас саҕатынан
Абылаан айдым,
Үгүс омук
Үгэтин-хоһоонунан
Үмүрүтэн түмнүм,

Элбэх омук

Этэр тылын

Иҕэрэн биэрдим.

Тыл иччитин

Тыллаах-өстөөх
тыһы ыымыы чыычаах гынан
Тылгар сыһыардым,

Саҕа дуораанын

Сайа-күдүө

Саһыаран биэрдим.гэр

Ырыа хоһоонун
Ыралаах тыллаан
Ымыы уктум.

Босхо бастааҕы

Муҕ-сор обургу

Боҕутуннаран буоллаҕына,

Буомурбут кутун-сүрүн

Булгута туойар буол!

Икки атахатааҕы
Эрэй-буруй обургу
Иэдэтэр күнүгэр
Эҕсиллибит көхсун
Эмтии этэр буол!

Саха ураанхайы

Санаа-оноо обургу

Сылатыннаран күнүгүр

Сарбыллыбыт санаатын

Саатата саҕарар буол!

Тыыннаах буолар кыһалҕатыгар,
Өлбөт буолар мөккүөрүгэр,-
Үлэҕэ өлөн-өлөн,
Сылааҕа сылдьан-сылдьан,

Тымныы кыһарыйан,

Хараҕа хаайан,

Киэһээлик диэки

Ооҕой бараан ордууну булан,
Титирик дьэиҕэ иһийэн,
Саах сыбах анныгар саһран,

Кыдьыктаах кыһын хатын

Кырыыстаах хараҕатын

Кылгата сытаан,

Сордоох уһун түүнун
Оччото сытаан,

Кэпсээн кэбэлийэн,

Сэһэн эстэн,

Оонньуур уурайан,

Утуйарга улук буолан,

Аһыырга ас аҕыйаан,

Санаалара сарбыллан,
Өйдөрө түмүллэн,
Көҕүстэрэ чөҕкүйэн,
Түөрт үөдэннэрэ бүөлэнэр

буоллаҕына -

Лыҕкынас ырыаҕынан

Тыыннарын уһатаар,

Чуҕкунас ырыаҕынан

Чуҕкуктырын уҕарытаар,

Дьиэрэнкэй ырыаҕынан
Чэҕкийбиттэрин дьэгдьитээр.

Самаан сайын барахсан

Салалланкэлэн

Тымныыны тыһытытан,

Кыһыны кыайан,

Хаары хараардан,

Күөх унаар урсуннанан,

Күөх от үктэллэнэн

Көр-нар күөннэнэн,

Уйгу-быйаҕ олохтонон,
Кэтит-кэскил кэһиилэнэн,
Уруй-туску доҕордонон,
Хоргуйбуту тоторон,
Ааспыты аһатан,
Охтубуту уотан,
Үөнү-көйүүрү үөскэтэн,
Көтөрү-сүүрэри көрүлэтэн,
Хамныыр-харамайы харайан,
Икки атахтаах
Иитимньитин тэрийэн,
Босхо бастаах
Буомун төлөрүтэн,
Саха урааҕхай саргытын салайдаҕына, -
Туҕуй ыһыаҕы торолутар,
Дэлэй ыыаҕы тэнитэр,
Эбир ырыаҕы элбэтэр,
Эҕэрдэлээх күннэригэр
Дохсун оонньууну олохтууругар,
Үтүө үҕкүүнү үөдүтэригэр
Лыҕкынас тыаскынан
Ырыаларын ыллыктаар,
Хоҕкунас ырыаынан
Хоһооннорун холлотоор,
Кэҕэ чуураан тойуккунан
Кэпсээннэрин кэҕэһирдээр ! - диэбитэ үһү Үрүҕ Аар тойон