Олох тугу анаабытын (В. Потапова)
Олох тугу анаабытын
Барытын билэ сатаабытым:
Доҕор эрэллээх сарынын,
Таптал дьикти таабырынын.
Арай биирдэ өйдөөбүтүм —
Суох эбит мин көрдөөбүтүм —
Уоттаах таптал сөҕүрүйэр,
Кураанах мастыы күлүбүрээт,
Доҕор күүһэ үлтүрүйэр,
Эппит тылын эҕирийээт.
Ол да буоллар абарбычча,
Ону-маны санаабычча,
Охтон хаалбат туһугар
Олох иһин охсуһар
Аналы талан ылары,
Атастар, баҕарыҥ, бары!