Бикитиэкэ диэн сиртэн ылыллыбыт
Тапталым күүһүнэн
Уһуктабын ардыгар соһуйан,
Кыра да тыастан уйгууран,
Самолет да ньиргийэр дуораана
Санатар миэхэ атын уорааны —
Ханна эрэ сабардаабыт
Хараҥа түүннэргэ былдьаппыттар
Ытаһар курдуктар мин тулабар оччоҕо.
Эдэри эспит,
Кырдьаҕаһы кыһалҕалаабыт,
Эрэйи элбэппит иирээни батыһа
Эргийэ көрөбүн Сири тула.
Тугу сүрэй!
Хайа диэки хайыс — сааны сүкпүт саллааттар
Ханна барытыгар харысхала суох үктэнэллэр.
Онтон долгуйан, абаран-сатаран,
Андаҕар биэриэхпин ордук баҕардым.
Иитиллибит Ийэ дойдубар,
Аймах дьоммор алгыстаах санаабын
Туттарар дохсун баҕанан туоллум.
Бу утуйан буккуруу сытар сиэним уолчаан
Хаһан да хааны тохпотун туһугар,
Бу түүлүгэр мичээрдии сытар мин балтым
Хаһан да хараҕын уута тахсыбатын туһугар.
Мин аймах дьонум, доҕотторум
Бары билэр-билбэт дьоһун дьонум
Олохтоох дьоллоро
Хаһан да огдолуйбатын туһугар,
Мин көрө илик сибэккилэрим
Хагдарыйан куоппаттарын иһин,
Бэйэм төрөтө илик оҕолорум
Төлкөлөрө түҥнэстибэтин иһин,
Мин көрө илик сибэккилэрим
Хагдарыйан куоппаттарын иһин,
Миигин таптыы илик доҕорум
Тапталын сылааһын иһин,
Тапталы түүйэр эрэ
Эдэр кыыс оҕо сэмэй түүлүн иһин,
Кэрэ кыыһын кэтэһэр
Эдэр уолан дьолун иһин,
Кырдьаҕас ийэм сылаас кыстыгын иһин,
Мин утары туруохпун баҕарабын
Уоттаах охсуһуу кирбиитигэр,
Уонна барыларын быыһаан ылыахпын
Уордайбыт тапталым күүһүнэн!
|
|
