Бикитиэкэ диэн сиртэн ылыллыбыт
Эргилин
Эн аастыҥ аттыбынан, хайыһан да көрбөккө,
Арахсыы күһүҥҥү сонун санныгар иилэ быраҕынан!
Эмиэ ааспат аймалҕанынан туолла
Күннээх уулусса чаҕылыйар сырдыга...
Күн уотун сойон эрэр күһүҥҥү кутаатын төлөнө
Суоһа улам мөлтүүр, аттыгар эрэ сылытар,
Соччонон күндү кини бүтэһик эйэҕэс мичээрэ.
Илдьэ хаалыаххын баҕараҕын, уһун кыһыҥҥы хаһаанан,
Сайыҥҥы өҥүрүк куйааһы өрүүтүн санатыах сылааһы...
Эн биһикки да дьаарбайар күөх тыабыт көҥүлүн бүрүйэ
Саһарбыт сэбирдэхтэр улам элбээн эрэллэр...
Ол туохтан эбитэ буолла?
Күөх лабаалар күн уотун тулуйбат намчы күүстэриттэн?
Эбэтэр кимтэн да көҥүлэ суох
Ардаҕы, тыалы, куйааһы, хаһыҥы кытары
Аһара оонньообут орой мэниктэр оҥоһуулара оччото дуу?
Эн аастыҥ аттыбынан, хайыһан да көрбөккө,
Арахсыы күһүҥҥү сонун санныгар иилэ быраҕынан.
Эргилин дуу,
Эн биһикки таптыыр тыабытыттан билигин да
Кыыла-көтөрө кыйданыа ыраах,
Кинилэр көрдөрүн-нардарын ыһыаҕар хаһан да
Хойутуохпут соуҕа диэн экчи эрэннэрэбин.
Итэҕэй, хагдарыйбыт да чэлгийэр аналлааҕар,
Эн эйэҕэс өйдөөх тылларгыттан,
Доҕордуу уунар илииҥ сылааһыттан,
Миигин олох таптыыр оҥоһуулаах дьылҕам мичээриттэн
Көҕөрөн кэлиэхтэрэ саһарбыт сэбирдэхтэр...
Оччоҕо,
Ытыктыыр маспыт бары лабааларын быыһыахпыт
Хаҕыс тымныыттан, хагдарыйан хаалыыттан...
Эргилин!
|
|
